ምስሓብ ሰራዊት ኢትዮጵያ ካብ ባድመ ተደናጉዩ ኣሎ ክንብል ንኽእል ኢና፣” ኣቶ የማነ ገብርኣብ!

0
60


“ናይ ዶብ ሕቶ ወይ ድማ ምስሓብ ሰራዊት ኢትዮጵያ ካብ ባድመ ተደናጉዩ ኣሎ ኢልና ክንዛረብ ንኽእል ኢና” ክብል ኣቶ የማነ ገብርኣብ ገሊጹ።

ኣቶ የማነ ነዚ ዝገለጸ፣ ኣብ ስዑዲ ዓረብ ምስ ዝርከቡ ኤርትራውያን ኣብ ዘካየዶ ሰሚናር ኮይኑ፣ ብዛዕባ ምሕንጻጽ ዶብን ምስሓብ ሰራዊት ኢትዮጵያ ካብ መሬት ኤርትራን ብዝምልከት ኣብ ዝሃቦ መብርሂ’ዩ።

ኣቶ የማን ኣብ መግለጺኡ፣ ዶብና ሕንጹጽ’ዩ፣ ብሕጂ ዝሕንጸጽ ዶብ የለን ድሕሪ ምባል፣ ኣብ ባድመ ዝርከብ ሰራዊት ኢትዮጵያ ግና ክሳብ እዚ እዋን’ዚ ከምዘይወጸ ኣመልኪቱ።

መዓስ’ ደኣ’ዩ ዝወጽእ ንዝብል ድማ፣ ንጹር ግዜ ከይሃበ፣ ክልቲኦም መንግስታት ኣብ ዝሰማምዕሉ መዓልቲ ከነተግብሮ ተረዳዲእና ኣሎና ኢሉ።

ስለምንታይ? ንዝብል ኣቶ የማነ፣ ኩነታት ናይ ኢትዮጵያ ዝፈጥሮ ዘሎ ጉዳይ ምዃኑ ኣስሚርሉ።

ንሱ፣ ነቲ ምኽንያት ብዝያዳ ከብርህ እንከሎ፣ ወያነ፣ ካብ ስልጣን ኣዲስ ኣበባ ይገለል እምበር፣ ኣብዚ እዋን’ዚ፣ ኣብ ትግራይ ተኣኻኺቡ፣ ኣንጻር እቲ ማእከላይ መንግስቲ ይሰርሕ ከምዘሎ ንከታተሎ ዘሎና’ዩ ድሕሪ ምባሉ፣ “ሰበ ስልጣን ወያነ ኣብ ልዕሊ ኤርትራ ዘለዎም መደባትን ኣተሓሳስባን’ውን ስለዘይተቐየረ፣ ሰራዊት ኢትዮጵያ ካብ ባድመ ዘይስሓበሉ ምኽንያት ንሱ ምዃኑ ከብርህ ፈቲኑ።

“ናይ ዶብ ሕቶ ጉዳይ፣ ተደናግዩ ኣሎ ኢልና ክንዛረብ ንኽእል ኢና። ንዘይተወሰነ እዋን ዝመሓላለፍ ግን ኣይኮነን፣” እኳ እንተበለ፣ ክሳብ መዓስ ተንጠልጢሉ ከምዝተርፍ ንጹር ናይ ግዜ ሰለዳ ከይሃበ ድማ መንግስታት ኤርትራን ኢትዮጵያን ኣብ ዝተሰማምዕሉ ክትግበር ምዃኑ ሓቢሩ።

ብዘይካ’ቲ ብ9 ሓምለ ኣብ ኣስመራ ዝተኸተመ ሓሙሽተ ነጥብታት ዝሓዘ ስምምዕ፣ ካልእ ውዕላት ይኹን ስምምዓት ከምዘየለ ዘመልከተ እቲ ኣማኻሪ ፕረዚደንት፣ ኣብ ስዑድያ ዝተኸተመ ስምምዕ’ውን ካብኡ ዝፍለ ከምዘይኮነ ገሊጹ።

ምውጻእ ሰራዊት ኢትዮጵያ ካብ ባድመ፣ ከም ቅድመ ኩነት ኣቐሚጡ፣ ን18 ዓመታት ምስ መንግስቲ ኢትዮጵያ ዝኾነ ርክብ ከምዘየካይድ ክሕንግድ ዝጸንሐ መንግስቲ ኤርትራ፣ ኣብዚ እዋን’ዚ ምስሓብ ሰራዊት ኢትዮጵያ፣ ከም ቀዳማይ ኣጀንድኡ ከምዘይርእዮ ድማ መግለጺ ኣማኻሪ ፕረዚደንት፣ ኣቶ የማነ ገብርኣብ ንጹር ጌርዎ ኣሎ።

Radio Erena: 15 April 2019



NO COMMENTS

LEAVE A REPLY